"საქართველო და მსოფლიო" - საზოგადოებრივ-პოლიტიკური გაზეთი

Georgia & World 

არნო ხიდირბეგიშვილი: "ВЛАДИМИРСКИЙ ЦЕНТРАЛ, ВЕТЕР СЕВЕРНЫЙ..."

18. 03. 2010  

 

 

ჩრდილოეთის ქარი - მეტეოროლოგიური პროგნოზი საქართველოში ბოლო ხანს საოცრად წააგავს პოლიტიკურს, მაგრამ, თუ იშვიათი სიძლიერის ჩრდილოეთის ქარებს ჩვენში გლობალური დათბობითა და დედამიწის ღერძის რვასანტიმეტრიანი გადახრით ხსნიან, ჩრდილოელი მეზობლისგან მონაქროლი ქარი საქართველოს პოლიტიკაში მხოლოდ ერთი გარემოებით აიხსნება: ვლადიმერ პუტინი - რუსეთის ხელისუფლების ცენტრალური ფიგურა ქართველი პოლიტიკოსების დათვალიერებას აწყობს და ხვდება საქართველოს აღმასრულებელი ხელისუფლების ექსმეთაურ ზურაბ ნოღაიდელსა და საკანონმდებლო ორგანოს ექსმეთაურ ნინო ბურჯანაძეს.

image


ჩრდილოეთის ქარი დღეს პუტინისკენ ბევრ სხვასაც მიერეკება, მაგალითად:
-
სახალხო პარტიის შეფსა და სტალინის სეხნია კობა დავითაშვილს, რომელიც, ჩვეულებრივ, ყველას ასწრებს და ხალხისთვის ყველაზე მტკივნეულ პრობლემებს კიდებს ხელს, რაც, თითქოსდა განგებ, მარცხით მთავრდება (როგორც ეს 2006 წელს მოხდა - მოტყუებულ მეანაბრეთათვის ანაბრების დაბრუნებასთან დაკავშირებით და როგორც ეს დღეს მოხდება - სტაჟისა და დამსახურების მიხედვით პენსიის გაზრდასთან დაკავშირებით);
-
კონსერვატორ ზვიად ძიძიგურს, რომელიც სრულებითაც არ იკვებება მარტოდენ კონსერვებით, რადგან ახსოვს ცნობილი ანდაზა; ყველა მამაკაცმა თავის ცხოვრებაში უნდა ააგოს სახლი (სახლები - ზვიად ძიძიგურის მიხედვით), დარგოს ხე და აღზარდოს ვაჟი. ზვიად გამსახურდიას (დისიდენტისა და საქართველოს პირველი პრეზიდენტის, რომელმაც სიცოცხლე შესწირა ქვეყნის რუსეთისგან გაუცხოებას) სეხნია და თანამოაზრე ზვიად-კონსერვატორი, ზვიად კონსტანტინეს ძისგან განსხვავებით, დროულად მიხვდა: პოლიტიკა საქართველოში საუკეთესო ბიზნესია! და მასწავლებლისგან განსხვავებით, ცოცხალი გადარჩა;
-
მთავარ ლეიბორისტ შალვა ნათელაშვილს, რომელიც ხშირად, სახალხო პარტიისგან განსხავებით, ნამდვილად ახერხებს სახალხო პრობლემების გადაჭრას, თუმცა, კონსერვატორებისგან განსხვავებით, სამუდამოდ დაკონსერვდა ამ თავის პოლიტიკურ ნიშაში.

 


პუტინი მათ არ მიიღებს, რადგან კონსულტაციები რუსეთის სუფრასთან დაშვების მოსურნეთათვის უსარგებლოა: მიუხედავად იმისა, რომ ხუთივე ზემოხსენებული მოღვაწე (ნოღაიდელი, ბურჯანაძე, დავითაშვილი, ძიძიგური, ნათელაშვილი) ჩრდილოეთის ქარის მიმართულებით დგას, ერთმანეთს ჯიუტად ვერ ამჩნევს (რაც ასე დამახასიათებელია ჩვენი ამბიციური და ანგაჟირებული პოლიტიკოსებისათვის), ამიტომ მათი კონსოლიდაცია შეუძლებელია.
ამითვე აიხსნება მათთან ლამის გაერთიანებული ირაკლი ალასანიას თავბრუდამხვევი ვირაჟი, რომელმაც ერთ დღეში გააცნობიერა, რომ სიყვარულში მესამე ზედმეტია: სჯობს პირველხარისხოვანი ალასანია იყო, ვიდრე - მესამეხარისხოვანი ნოღაიდელი! - მიახვედრეს ალასანია და უძღები შვილის დაბრუნების აღსანიშნავად ქართველი ელიტის მიერ გამართულმა შეხვედრამ ამ გათვლის მართებულობა დაადასტურა (მით უმეტეს, რომ მოსკოვში პოლიტიკური ტურის საშუალება მას კიდევ უამრავი ცნობილი მიზეზით ექნება). ჯერჯერობით კი მოსალოდნელი ადგილობრივი თვითმმართველობის არჩევნებში გამარჯვების ნიშნად ქართველმა ელიტამ ირაკლის სამფეროვანი (წითელი, ლურჯი და თეთრი) ბურთი გადასცა, როგორც რუსული, ასევე ამერიკული დროშების ფერის... დაე, ხალხმა ტვინი იჭყლიტოს ნაირნაირ პრაიმერებზე, რომელთა მიღმაც მუდამ რაღაცას მალავენ ანაფორის ქვეშ და არავინ ამბობს სიმართლეს...
(
გაიხსენეთ ჩემი სიტყვები - ამ კლოუნადის შედეგად, სიცრუით დაღლილი და გაღიზიანებული თბილისელები . . 30 მაისს პირდაპირი კენჭისყრით ქალაქის მერად მმართველი პარტიის კანდიდატს, მოქმედ მერს - გიგი უგულავას აირჩევენ!)
აი, რუსეთის სუფრასთან უკვე დაშვებულთა (ბურჯანაძე და ნოღაიდელი) მოსკოვურმა შეხვედრებმა ქართველ და რუს საზოგადოებას დაანახა, რომ კრემლს შეუძლია ქართული რეჟიმის ყოფილ ხელმძღვანელებთან საუბარიც კი და რომ პრობლემა  მხოლოდ სააკაშვილია!
ამასთან, აშშ-ისა და ევროპის წინაშე ქართული პოლიტისტებლიშმენტის არასტაბილურობა, უპრინციპობა და მონანიება იქნა დემონსტრირებული: გუშინ - პროამერიკული, დღეს - პრორუსული, ხან - ხელისუფლების წარმომადგენელთა და ხანაც - აშკარა ოპოზიციონერთა...
თუმცა საკითხი მხოლოდ ამით არ ამოიწურება: რუსეთის ხელისუფლების, მართალია, სუსტი, მაგრამ მაინც ინტერესი ამ ორი ფიგურის მიმართ იმ კონკრეტული ამოცანებითაც აიხსნება, რომელთა შესრულებაც მათ იკისრეს.
ნოღაიდელის წინაშე მდგარი ამოცანები ბურჯანაძის ამოცანებისგან განსხვავდება,
რის შესახებაც ქართველ რკინის ლედის აეროპორტში, მოსკოვში გაფრენის წინ თავად წამოსცდა ტელეკამერების წინ: სხვებისგან განსხვავებით, მოსკოვში დიდი პოლიტიკის საკეთებლად მივდივარ! იგი პუტინთან შეხვედრის ეფექტითაც არ დაკმაყოფილებულა და დიდ ავიაციაში დაბრუნების განსამტკიცებლად, მოსკოვიდან ევროპასა და აშშ-ში გაფრინდა, რითაც მოქმედი, პასუხისმგებლობით აღჭურვილი პოლიტიკოსის მიერ როგორც რუსეთის, ასევე ევროპული და ამერიკული ფაქტორების იგნორირების დაუშვებლობის დემონსტრირება მოახდინა. ამით მან ხაზი გაუსვა თავის განსხვავებას ერთმნიშვნელოვნად ამერიკელი სააკაშვილისა და უკვე რუსი ნოღაიდელისგან.
დიახ, ბურჯანაძემ დღეს ხელი მოჰკიდა ამოცანებს, რომლებიც სააკაშვილი-ჟვანია-ბურჯანაძის სამეულის წინაშე 2003 წელს იდგა: ოფიციალური ხელისუფლების დასუსტება, ნიადაგის მომზადება მის შესაცვლელად და ახალი ძალებისთვის მოედნის გაწმენდა. მაგრამ ამისათვის, როგორც დემოკრატიული მოძრაობა - ერთიანი საქართველოს პარტიის ლიდერმა უფრო აქტიური მოძრაობა უნდა გააკეთოს და შეამზადოს ნამდვილად რევოლუციური ელექტორატი და არა ამ ორი წლის წინათ შექმნილი დემოკრატიის განვითარების ფონდის მსგავსი მადამ ნინოს ცვილის ფიგურების მუზეუმი. ასეთი ბულდოზერულ-პოლიტიკური ამოცანებისთვის ნოღაიდელის წინაშე მას ერთი აშკარა უპირატესობა აქვს: ის ნამდვილად არ არის სააკაშვილის პროექტი და მისი საიდუმლო დირექტივებითაც არ ხელმძღვანელობს.
აი, მოძრაობა სამართლიანი საქართველოსათვის პარტიის ლიდერმა ნოღაიდელმა კი სულ სხვა მოძრაობა უნდა გააკეთოს (შემთხვევით როდი ფიგურირებს ბურჯანაძისა და ნოღაიდელის პარტიათა უსახურ დასახელებებში მათი მასწავლებლის, აწ განსვენებულ ზურაბ ჟვანიას ფანტაზიის შესაფერისი სიტყვა მოძრაობა! ჟვანიასირომელმაც ოდესღაც თავის პარტიას უცნაური სახელი - გაერთიანებული დემოკრატები დაარქვა).
ამბობენ, რომ 1939 წელს ფრანკლინ რუზველტს ჰკითხეს: როგორ აფასებს თავისი მოკავშირის, ნიკარაგუის დიქტატორის - ანასტასიო სამოსას მრავარიცხოვან ბოროტმოქმედებას?!  რაზეც აშშ-ის პრეზიდენტმა მიუგო: შეიძლება ის ძუკნიშვილია, მაგრამ - ჩვენი ძუკნიშვილი!
ძუკნიშვილებზე დაყრდნობას გინდაც საგარეოპოლიტიკური ტრადიცია უწოდეთ, მაგრამ საქმე, რომელსაც ისინი ასრულებენ, ნამდვილად აუცილებელია სხვადასხვა ეტაპებზე, ხოლო მათ გარდა ამ ძუკნიშვილური საქმის კეთების უნარი არავის შეწევს!
ამგვარად, წინა ეტაპზე რუსეთის ხელისუფლებამ თავისუფლება მისცა ქართველებს: ზოგიერთ საზოგადო მოღვაწესა და ბიზნესმენს გოჩა ძასოხოვს (ზურაბ ნოღაიდელისა და მაშასადამე, როგორც ამბობენ, თავად სააკაშვილის ბიზნესპარტნიორს), ალიკა ებრალიძესა და სხვებს. ამ უკანასკნელებმა მოლოდინი ვერ გაამართლეს და წამოჭრილი ამოცანებიც ვერ შეასრულეს, თანაც ერთმანეთს წაეკიდნენ ხროვის ბელადობის გამო, თუმცა ბუფერული კონგრეს-ასამბლეები კი შექმნეს და ხმამაღალდასახელებიან კონფერენცია-ყრილობებიც ჩაატარეს. ტყუილუბრალოდ როდი განაცხადა ამა წლის 9 მარტს . ბათუმში ახალი ქართულ-თურქული სკოლის გახსნაზე პრეზდინეტმა სააკაშვილმა: რუსეთში 400.000 ქართველიღა დარჩა... რუსეთმა ვერ შეძლო მათ შორის დასაყრდენის გამოძებნა, გარდა რამდენიმე დეგრადირებული კაცისა. ჩვენს თანამემამულეებს კარგად ესმით განსხვავება რფ-ის პოლიტიკურ სისტემასა და საქართველოს შორის... რომელიც ევროპაში რუსეთის გარეშეც იარსებებს.


ამიტომაც ნოღაიდელის საიდუმლო ამოცანებია:
1)
ამ თავქარიანთა და უგნურთა, მდიდართა და ნახევრად კრიმინალთა გაერთიანება მისი ფრთის ქვეშ და მათი ძალისხმევისა და ფინანსების მიმართვა ერთი საჭირო მიმართულებით;
2)
არაოფიციალური შუამდგომლობა ოფიციალურ მოსკოვსა და თბილისს შორის
: მიუხედავად მათი ხელისუფლების უთანხმოებისა, რუსეთი და საქართველო ხომ საერთო 900-კმ-იანი საზღვრის მქონე მეზობელ სახელმწიფოებად რჩებიან, ამიტომ საერთო პრობლემების გადაჭრის აუცილებლობას ვერ გავექცევით, ამასთან, დიპლომატიურ ურთიერთობათა არარსებობის გათვალისწინებით; ამ პრობლემების გადაჭრა დღეს მარტოდენ შუამდგომლის დახმარებითაა შესაძლებელი (როგორც ლარსის სასაზღვრო-გამშვები პუნქტის გახსნა საქართველოში შვეიცარიის საელჩოსთან არსებული რუსეთის ფედერაციის ინტერესთა სექციის შუამდგომლობით მოხდა).
ნოღაიდელის მიმორბენანი შუამდგომლობას შეიძლება მიეწეროს, მაგალითად, ისედაც უკვე გადაწყვეტილი თბილის-მოსკოვის პირდაპირი ჩარტერული ავიარეისის გახსნა, რითაც ის დაწყებული დიალოგის შედეგიანობაზე მიუთითებს;
3)
საქართველოში ხელისუფლების ხავერდოვნად გადაცემის მომზადება და, ამასთან, პრეზინდეტ მიხეილ სააკაშვილისთვის უსაფრთხოების გარანტიის უზრუნველყოფა, რათა მას ვლადიმირსკი ცენტრალი და ის ქირურგიული ოპერაციები არ ემუქრებოდეს, რომელთა ხსენებაც სააკაშვილს თითქმის ყველა საჯარო გამოსვლაში უყვარს
(სამსახური - სამსახურისთვის: დღეს ხომ თავად ნოღაიდელის უსაფრთხოების გარანტი მიხეილ სააკაშვილია!).
არსებობს სხვა ამოცანებიც, მაგრამ ზემოჩამოთვლილი  ძირითადია და ერთობ სახიფათო... ნიჭიერმა ქართველმა ხალხმა, რომელსაც არც კი უეჭვია ნოღაიდელის ფართო მხრებზე დაკისრებული პოლიტიკური ტვირთის უზომო სიმძიმე, ტყუილუბრალოდ როდი შეადარა იგი იმ შრომისმოყვარე და სიმპათიურ ცხოველს, რომელზე ამხედრებული იესო ქრისტეც იერუსალიმში შევიდა და დაღლილი ვირი უწოდა! მთავარია, რომ ბატონმა ზურაბმა შეძლოს ამ ტვირთის ზიდვა და არ დაავიწყდეს ელექტრონულ (როგორც ამბობენ, დისტანციური პულტით მართვად!) მოწყობილობაზე თავის ნაოპერაციებ გულში, რათა მან სურამის ციხის ლეგენდის გმირი ზურაბის ანდა მეორე ზურაბის, მასწავლებლის, ხვედრი არ გაიზიაროს...


P.S.
Владимирский централ, ветер северный
Когда я банковал, жизнь разменяна
Но не "очко" обычно губит
А к одиннадцати - туз . . .