Georgia & World 

 

არნო ხიდირბეგიშვილი: ქართველ ხალხს არ უნდა ნატოში, მას რუსეთთან მეგობრობა

სურს!

03. 07. 2009  

თბილისი პატარა ქალაქია! - ხშირად ამბობენ ნამდვილი თბილისელები, როცა სიხარულით აღმოაჩენენ საერთო მეგობრებსა და ნაცნობებს ან ვისამე ფარულ საქციელზე მსჯელობენ, რომლის შესახებაც ყველამ შეიტყო. გათვითცნობიერებულობის მიუხედავად (აი, პარადოქსი!) თბილისელები ხშირად ბავშვებივით მიამიტები არიან და მათი გაბრიყვება ისევე, როგორც მთელი საქართველოს მოსახლეობისა, არავითარ სირთულეს არ წარმოადგენს... ამიტომაც პრეზიდენტ სააკაშვილს ერთ რამეში სავსებით ვეთანხმები: საქართველოში არ არის ხელისუფლების კრიზისი! საქართველოში საზოგადოებრივი ცნობიერების კრიზისია, რაც გაცილებით უარესია...

დიახაც, ლენგლის (ცე-რე-უს შტაბბინა, - ..) ბიჭებმა ძალიან იყოჩაღეს: დეზინფორმაციისა და სიცრუის, ჯაშუშური სკანდალების, გამყიდველი პოლიტიკოსების გასაოცარი პირუეტებისა და სხვა ვნებათაღელვის ასეთ ნიაღვარს ვერავინ გაუძლებდა, პროფესიონალურად თავსმოხვეულმა ჩვენთვის უცხო იდეოლოგიამ, რომელმაც კულტურული კოდი - ქართველი ერის საბაზისო ზნეობრივი ფასეულობები გატეხა, საზოგადოების ცნობიერების სიღრმეებში შეაღწია და მისი კრიზისი გამოიწვია.

შედეგად, ქართველი საზოგადოება დაიღალა, განიხიბლა, შეეგუა და დამორჩილდა - საბოლოოდ დაშინებული და დაბნეული ხალხი ვეღარ ასხვავებს სიკეთესა და ბოროტებას, აღარ აზროვნებს დამოუკიდებლად, რეალურად აღარ აღიქვამს მომხდარს და არ გამოაქვს ადეკვატური დასკვნები - მის ნაცვლად ამას სხვები აკეთებენ... ამერიკის შეერთებულმა შტატებმა, პოლიტიკოსი-ბიზნესმენისა და ავანტიურისტი ჯორჯ სოროსის წილობრივი მონაწილეობით, სსრ კავშირის დაშლის შემდეგ ხელთ იგდო უპატრონოდ დარჩენილი საქართველო და აქ საკუთარი პოლიტისტებლიშმენტი - პოლიტიკოსები, ჟურნალისტები და . . ექსპერტები აღმოაცენა, სახელმწიფო ჩინოვნიკები ძალოვანი უწყებებიდან სოროსის შედარებით მაღალ ხელფასებზე დასვა (როგორც ნემსებზე!); მრავალრიცხოვანი NJO-ების მეშვეობით, სოროსის ფონდის ქართული ფილიალის გრანტებით მოისყიდა საშუალო კლასის ნაწილი, ხოლო დანარჩენი უმრავლესობა იძულებული შეიქნა, მდგომარეობას შეგუებოდა და ვაივაგლახით ეცხოვრა, ზემონახსენები კატეგორიის საყოფაცხოვრებო მოთხოვნილებები დაეკმაყოფილებინა სერვისისა და მომსახურების, ტურიზმისა და დასვენების, ბიზნესისა და ვაჭრობის, მშენებლობისა და კომუნალური მეურნეობის სფეროებში, ანდა, სულს ითქვამს პენსიებითა და უცხოეთიდან, ძირითადად - რუსეთიდან ნათესავების მიერ გამოგზავნილი დახმარებით...

საქართველო, რომელსაც ედუარდ შევარდნაძე მუდამ დერეფანს ეძახდა, დღეს მართლაც დაემსგავსა საროსკიპოს დერეფანს, სადაც ზოგიერთი ოთახის კარი, ცნობილი მიზეზების გამო, შიგნიდანაა დაკეტილი (აფხაზეთი და სამხრეთ ოსეთი), ხოლო დანარჩენი კარები ფართოდაა გაღებული და შიგნით შესვლას ლამობს ყველა, ვინც ფული გადაიხადა, სანამ დერეფანში მქროლავ ჩრდილოეთის ქარს ისინიც არ მიუკეტავს...

ამიტომ დღეს ხელისუფლების განსჯა და პრეზიდენტის გადადგომის მოთხოვნა ალოგიკურია ისევე, როგორც ალოგიკურია საკუთარი ცნობიერების განსჯა ან მისი გადადგომის მოთხოვნა: არ შეიძლება მუშაობდე საროსკიპოში და უბიწობას ინარჩუნებდე -

საქართველოს ხელისუფლება ამერიკული პროექტის განუყოფელი ნაწილია და მისი შეცვლა შეუძლებელია თავად პროექტის დახურვის გარეშე,

რომლის მიმართაც ქართველი საზოგადოების გაბრიყვებული ნაწილი ჯერ კიდევ სიმპათიითაა გამსჭვალული, ისევე, როგორც აშშ-ისა და ნატოს გეოპოლიტიკურ ინტერესებთან ერთად სასწორის პინაზე დადებული დასავლური ლიბერალურ-დემოკრატიული ფასეულობებისადმი.

ხელისუფლება, თუკი ის, რა თქმა უნდა, თვითმკვლელი არ არის, პროექტს ნებაყოფლობით არ დახურავს, ხოლო ცნობიერების კრიზისი ქართველ საზოგადოებას იმის დანახვის საშუალებას არ აძლევს, რომ პროექტი და ხელისუფლება განუყოფელია და რომ პერსონალიების ცვლა ხელისუფლებაში (პრეზიდენტის, პარლამენტის) პროექტის შენარჩუნების პირობებში ვერაფერს შეცვლის! სწორედ საზოგადოებრივი ცნობიერების ამ კრიზისს ეფუძნება საქართველოს ხელისუფლება და არა NLO- მაგვარ შენობას, რომელიც თბილისში ბუშის სახელობის ქუჩაზე მდებარეობს (შსს, - . .).

ამ კრიზისს, გარკვეულწილად, ხელი შეუწყო რადიკალურმა ოპოზიციამ, რომელმაც საზოგადოება ხელისუფლებაში მოსასვლელად გამოიყენა და, ამავე დროს, ხელშეუხებელი დატოვა თავად პროექტი! აქ ცნობიერების ნაკადს არცთუ შორეულ წარსულში გადავყავარ - 2008 წლის თებერვალში, როცა მაშინდელ პარლამენტის თავმჯდომარეს ნინო ბურჯანაძეს ვკითხე: სახელმწიფო ნეიტრალიტეტი საერთაშორისო კვარტეტის - გაეროს, ევროკავშირის, აშშ-ისა და რუსეთის გარანტიებით საქართველოსთვის მითია თუ აქვს აზრი, ისევე, როგორც ფინეთისთვის, შვედეთისა და შვეიცარიისთვის?

 
ნატოში გაწევრებით ხომ არ გადავიქცევით ისლამისტური ფუნდამენტალიზმის სამიზნედ? პასუხი ასეთი მივიღე: არა, ჩვენ არ გადავიქცევით ვისამე სამიზნედ, რადგან ისლამური ქვეყანა თურქეთი ნატოს წევრია და ძალიან ბევრ ისლამისტურ ქვეყანასთან ნატოს ნორმალური ურთიერთობები აქვს, ხოლო ფუნდამენტალიზმი არა მხოლოდ ნატოს წევრი ქვეყნების, არამედ თავად მუსლიმანური სახელმწიფოების პრობლემაა, რომელთაგან ბევრს ეს მშვენივრად ესმის და ცდილობს, ამას შეებრძოლოს... საქართველო აუცილებლად გახდება ნატოს წევრი, რადგან მიგვაჩნია, რომ ეს ორგანიზაცია უზრუნველყოფს არა მხოლოდ უსაფრთხოებას, არამედ წევრი-ქვეყნების დემოკრატიულ განვითარებასაც

ჩრდილოატლანტიკურ გაერთიანებაში შედიან ქვეყნები, რომლებიც პატივს სცემენ განვითარების დემოკრატიულ პრინციპებს! რაც შეეხება ნეიტრალიტეტს, ეს გამოსავალი არ არის. თვალი გადაავლეთ იმ სახელმწიფოთა გეოპოლიტიკურ მდგომარეობას, ისტორიასა და რეალობას, რომლებიც მაგალითისთვის თავად ჩამოთვალეთ და მიხვდებით, რომ საქართველოსთვის ნეიტრალიტეტი არარეალურია, რადგან ის მის წინაშე წამოჭრილ ვერც ერთ პრობლემას ვერ გადაჭრის... 

ყოველთვის, როცა საუბარი ეხება საქართველოს ნატოში გაწევრებას, რუსეთში ოპონენტები ცდილობენ, ნატოსგან საფრთხობელა შექმნან და ავიწყდებათ, რომ რუსეთის უახლოესი მეზობლები - ბალტიისპირეთი, პოლონეთი და სხვა სახელმწიფოები ნატოს წევრები არიან, მაგრამ რუსეთს არაფრით ემუქრებიან 

(13.02.2008.
ინტერვიუ РИА НОВОСТИ-სთვის, www.rian.ru).

ახლა კი გთავაზობთ ფრაგმენტს რუსეთის საგარეო საქმეთა მინისტრის . . ლავროვის გამოსვლიდან უსაფრთხოების სფეროში პრობლემების განხილვის თაობაზე, ეუთოს ყოველწლიური კონფერენციის გახსნაზე ვენაში 2009 წლის 23 ივნისს: სახელმწიფოებმა და საერთაშორისო ორგანიზაციებმა უნდა დაადასტურონ, მაგრამ უკვე იურიდიულად სავალდებულო ფორმით, ვალდებულებები, რომლებიც უწინ ეუთოსა და რუსეთ-ნატოს საბჭოს წინაშე აიღეს, კერძოდ კი:

-
არ უზრუნველყოს თავისი უსაფრთხოება სხვების უსაფრთხოების ხარჯზე;

-
არ დაუშვას სამხედრო კავშირებისა და კოალიციების ჩარჩოებში მოქმედებები, რომლებიც დაასუსტებს უსაფრთხოების საერთო სივრცის ერთიანობას, მათ შორის, არ დაუშვას თავისი ტერიტორიის გამოყენება სხვა სახელმწიფოების უსაფრთხოების დაზარალების ხარჯზე, ევრო-ატლანტიკაში მშვიდობისა და სტაბილურობის საზიანოდ;

-
არ დაუშვას, სამხედრო გაერთიანებების განვითარება ხორციელდებოდეს ხელშეკრულების სხვა წევრების საზიანოდ;

-
პატივი სცეს ნებისმიერი სახელმწიფოს უფლებას ნეიტრალიტეტზე.

ეს მესიჯები უთუოდ აშშ-ისა და საქართველოს მისამართითაა გამოგზავნილი! არადა, ჯერ კიდევ 2001 წელს თქვენმა მონა-მორჩილმა საქართველოს სახელმწიფო ნეიტრალიტეტის თემის დამუშავება დაიწყო პოლიტიკურ მეცნიერებათა დოქტორთან, პროფესორ ალექსანდრე ჭაჭიასთან ერთად და ამ საკითხს მრავალი პუბლიკაცია მიუძღვნა როგორც ბეჭდვით და ელექტრონულ პრესაში (www.rian.ru; www.day.az; www.asavali.ge; www.geworld.net), ისე განსხვავებული ფორმატის რამდენიმე ტელეგამოსვლაში. დღეს კიდევ ერთხელ ვუსვამ ხაზს - ნეიტრალიტეტი ჩვენ გვჭირდებოდა როგორც საშუალება საქართველოს ტერიტორიული ერთიანობის აღსადგენად! მაგრამ ჩვენი ხელისუფლება და ქართველი პროქტოპოლიტოლოგები პასუხად იკურთხებოდნენ და... 08.08.08 მატარებელმა საქართველო-ნეიტრალიტეტი ჩაიქროლა.

2008
წლის 14 აგვისტოს, საომარი მოქმედებების დასრულებამდე და რუსეთის მიერ აფხაზეთისა და სამხრეთ ოსეთის აღიარებამდე, ბეჭდვითი მედიის საშუალებით ვცდილობდი, დამეყოლიებინა ხელისუფლება: დღეს უნდა ვიფიქროთ უკვე არა ნეიტრალურ სტატუსზე, არამედ საქართველოს ფედერაციულ მოწყობაზე, სადაც ფედერაციის უფლებით (კონფედერაცია) შევლენ აფხაზეთი და სამხრეთ ოსეთი

თუ ისევ ლანძღვას მოვყვებით ან კეთილშობილ ქალწულთა პანსიონის მობინადრე ქალწულებივით გავიბუტებით, ამ შესაძლებლობასაც ხელიდან გავუშვებთ, რადგან ერთ მდინარეში ორჯერ ვერ შეხვალ: დრო მიდის და ვითარება ისევ შეიძლება გაუარესდეს იმდენად, რომ დაკარგულ ტერიტორიებზე ფიქრის თავიც არ გვექნება. უფრო მეტიც: ალექსანდრე ჭაჭია ევედრებოდა ხელისუფლებას, გონს მოსულიყო და პრეზიდენტ სააკაშვილს თავის კანდიდატურას სთავაზობდა მედიატორის რანგში, მისი აზრით, ჯერ კიდევ შესაძლებელ მოლაპარაკებებში, რომლის ორგანიზებასაც თავად კისრულობდა! მაგრამ ამაოდ... ხმა მღაღადებლისა უდაბნოსა შინა არავინ შეისმინა და 26.08.08 რუსეთის ფედერაციამ აღიარა აფხაზეთისა და სამხრეთ ოსეთის დამოუკიდებლობა.

დღეს კი ერთადერთი, რასაც საცხოვრებელ ადგილებში ლტოლვილთა დაბრუნება, საქართველო-აფხაზეთი-სამხრეთ ოსეთის ერთიან სივრცეში მოქალაქეთა თავისუფალი მიგრაციის უზრუნველყოფა, ჩვენი ეკონომიკის აღდგენა და ინტეგრირება, ხოლო შემდეგ აფხაზებისა და ოსების ერთიანი სახელმწიფოს წიაღში დაბრუნება შეუძლია, რუსეთისა და საქართველოს კავშირის შესახებ ხელშეკრულებაა! ჩვენ უნდა დავუბრუნოთ აფხაზებსა და ოსებს მათი მშობლიური საქართველო - მაშინ ისინი ჩვენს მშობლიურ აფხაზეთსა და სამაჩაბლოს დაგვიბრუნებენ, ხოლო ჩვენი მშვიდობისა და უსაფრთხოების გარანტი რუსეთი უნდა იყოს!

დღეს სასწრაფოდ უნდა ვიფიქროთ ამ ხელშეკრულების პროექტზე, რათა მესამედაც არ დავკარგოთ შანსი, რომელიც შესაძლოა, საქართველოსთვის უკანასკნელი აღმოჩნდეს...

ცნობიერების ნაკადს ისევ წარსულისკენ მივყავარ: ვარდების რევოლუციის შემდეგ დღევანდელ რადიკალებს - მაშინდელ უმაღლეს სახელმწიფო პირებს: პარლამენტის თავმჯდომარეს ნინო ბურჯანაძეს, პრემიერ-მინისტრ ნოღაიდელს, თავდაცვისა და შს მინისტრ-გენპროკურორ ოქრუაშვილს ჩვენთვის, ნამდვილი პატრიოტებისთვის (და არა ლენგლის ბიჭებისა და სამეფო კარის პროქტოპოლიტოლოგებისთვის) ყური რომ დაეგდოთ, მაშინ

განა საქართველო დაკარგავდა თავისი ტერიტორიების 20 პროცენტსა და 175 ჯარისკაცს? და კიდევ რამდენი დაიღუპება იმ 500 კაციდან, ამ დღეებში ავღანეთში, აშშ ცენტრალური სარდლობის უფროსის, გენერალ დევიდ პეტრეუსის თქმით, ბოევიკებისთვის საიმედო თავშესაფრად ქცეულ ყველაზე საშიშ რაიონებში საომრად რომ მიემართებიან?!

რატომ ეომება ქართველი ავღანელს?! ამ დანაშაულებრივი გადაწყვეტილებისთვის მხარდაჭერამდე საქართველოს პარლამენტიდან ვინმე ესტუმრა პარლამენტის ბიბლიოთეკას და წაიკითხა, უძველესი დროიდან როგორი პატივისცემით ეპყრობოდნენ მამაც გურჯებს ავღანელი მმართველები და მეომრები?! საქართველო რომ კოლექტიური უსაფრთხოების შესახებ ხელშეკრულების ორგანიზაციის (ОДКБ) წევრი ყოფილიყო, მოისურვებდა კი ნატოსთან პარტნიორობას და თავის ჭაბუკებს ცხელ წერტილებში - ერაყსა და ავღანეთში გაგზავნიდა? ავღანეთში, რომელმაც, სხვათა შორის, 2008 წელს დსთ-სა და შანხაის თანამშრომლობის ორგანიზაციაში (ШОС) გაწევრების სურვილი გამოთქვა?!

რატომ დავკარგეთ საქართველოს სასოფლო-სამეურნეო პროდუქციის, ღვინისა და მინერალური წყლებისთვის უალტერნატივო რუსული ბაზარი, რის შედეგადაც უზარმაზარი ეკონომიკური ზარალი მივიღეთ?! რატომ არ დავისახეთ მიზნად ევრაზიის ეკონომიკური თანამეგობრობის (ЕврАзЭС), თანამშრომლობის შანხაის ორგანიზაციისა (ШОС) და ერთიანი ეკონომიკური სივრცის (ЕЭП) წევრობა, რათა მთელი მსოფლიოსთვის მომხიბვლელ ამ ეკონომიკურ სივრცეში სრულფასოვანი მოთამაშეები გავმხდარიყავით?!

განა დსთ-ის დატოვებითა და რუსული ენის დავიწყებით (საერთაშორისო ურთიერთობის ენა ხმელეთის ერთ მეექვსედზე!) ჩვენ არ გავუუცხოვდებით ჩვენთვის ისტორიულად და კულტურულად ახლობელ თანამეგობრობის ქვეყნების ხალხებს?! განა ასეთი რა ცნობიერების კრიზისი გვჭირს, რომ უგულებელვყოფთ დიდ სამამულო ომში გამარჯვებას, სადაც მხარდამხარ ვიბრძოდით; ყამირს, რომელიც ერთად გავტეხეთ; და ჩერნობილს, რომლის ლიკვიდირებაც ერთად მოვახდინეთ?! რა ენაზე ელაპარაკა პრეზიდენტი სააკაშვილი სომხეთის პრეზიდენტს ამასწინანდელი ვიზიტისას, ასევე, დსთ-ის სხვა ქვეყნების პრეზიდენტებს, რომლებსაც საქართველოში უმასპინძლა, ანდა იქით ეწვია - შემთხვევით, რუსულად ხომ არა?! განა დსთ-ის ქვეყნების ელჩები, მიუხედავად საქართველოში ბოლო წლებში ხშირად მომხდარი აყალმაყალისა, თავს უფლებას აძლევენ, ასეთი უპატივცემულო გამოთქმებით დაარიგონ ჭკუა ქართველ ხალხს და ჩაერიონ საქართველოს საშინაო საქმეებში, როგორც ეს ამასწინანდელი საპროტესტო აქციებისას მოიმოქმედეს დასავლეთის ქვეყნების ელჩებმა, რომელთაგან ზოგიერთი საქართველოში თავისი ჰომოსექსუალური ორიენტაციითაა ცნობილი?!

განა ცნობიერების კრიზისზე არ მეტყველებს ის ფაქტი, რომ განგაშის ატეხვის მაგივრად, ბევრს გაუხარდა, როცა რუსეთი უცებ დაყაბულდა საქართველოდან თავისი სამხედრო ბაზების გაყვანას დადგენილი 25 წლის ნაცვლად ჯერ 15, ხოლო შემდეგ - 10, მერე - 2 და, ბოლოს, 1 წელიწადში - 2007 წლის ნოემბრამდე?! რატომ არ დააეჭვა ამ თვინიერებამ ექსპრეზიდენტი შევარდნაძე და მოქმედი პრეზიდენტი სააკაშვილი, რომლებიც მხოლოდ იმას დაობდნენ, ვის ეკუთვნოდა პირველობის დაფნის გვირგვინი ისტორიულ მისიაში - საქართველოს გათავისუფლებაში რუსი ჯარისკაცის საძულველი ჩექმისგან, რომელიც მას ბოლო 200 წლის განმავლობაში თელავდა?!

განა ცნობიერების კრიზისის ბრალი არაა, რომ შარშანდელ ტრაგედიას, როცა რუსებსა და ქართველებს შორის სისხლი დაიღვარა (დაღვარეს!), ბევრი ომს უწოდებს?! წარმოგვიდგენია კი, რას ნიშნავს ნამდვილი ომი რუსეთთან?! განა მსოფლიოში უძლიერეს არმიასთან ნამდვილი ომის შედეგად მხოლოდ 175 ქართველი სამხედრო მოსამსახურე დაიღუპებოდა ან უგზოუკვლოდ დაიკარგებოდა?! განა შეიძლებოდა, 200 რუსულ თვითმფრინავს დაებომბა საქართველო, რომლის ტერიტორია, რამდენიმე ათეული სახლის გამოკლებით, ხელუხლებელი დარჩა?! რომც არ დავუჯეროთ ჩვენს ხელისუფლებას, რომელიც ირწმუნება, რომ საქართველოს უახლესი რუსული საბრძოლო ავიაცია უტევდა და ვივარაუდოთ, რომ გასული წლის აგვისტოში ძველისძველი საფრონტო ბომბდამშენები СУ-24-ები გვიტევდნენ, რომელთაგან თითოეულს შეუძლია 6 რაკეტა ВОЗДУХ-ПОВЕРХНОСТЬ-ის, 7 ბომბის, 6 უმართავი რაკეტის, 2 რაკეტა ВОЗДУХ-ВОЗДУХ-ის გადატანა; 3 საქვემეხო კონტეინერისა და 500-საბრძოლომასალიანი 23 მმ ქვემეხის ჩაუთვლელად, და გადავამრავლოთ ბომბებისა და რაკეტების ეს რაოდენობა 200 თვითმფრინავზე, რომლებმაც თითქოსდა დაბომბეს საქართველო: გამოვა, რომ 2008 წლის 8-დან 12 აგვისტომდე თავზე დაგვეყარა 4.200 რაკეტა და ბომბი (!), და ეს იმ შემთხვევაში, თუ ჩავთვლით, რომ თითოეულმა თვითმფრინავმა მხოლოდ ერთი საბრძოლო გაფრენა განახორციელა!.. დარწმუნებული ხართ, რომ ჯერ კიდევ ცოცხალი ბრძანდებით?!

რატომ არაფერს ამბობს ამაზე რადიკალური ოპოზიცია?! ტრიბუნიდან ქურდული ბაზარი (ათასობით თანამოქალაქის წინაშე!) არ რცხვენიათ და ხალხისთვის სიმართლის თქმა ტეხავს?! იციან კი, რომ ნატოს წვრთნებისას 6 მაისიდან 1 ივნისამდე თბილისის შორიახლო (ვაზიანის სამხედრო ბაზაზე) კლიმატურ იარაღს ცდიდნენ (რომლის ფუნქციური დანიშნულება ამინდზე ზემოქმედებაა - სხვადასხვა რეაგენტის მეშვეობით ხელოვნური ატმოსფერული ცვლილებების გამოწვევა: ქარიშხლის, თოვლის, ნისლის, ტაიფუნებისა და ჭექა-ქუხილის)? იქნებ ახლა მაინც მიხვდნენ, რატომ არ წყდებოდა ბოლო კვირებში თბილისში არნახული ჭექა-ქუხილი, რომლებმაც მათი საპროტესტო აქციები ჩარეცხა?! საიდან უნდა იცოდნენ, როცა მათ უმრავლესობას არმიაში არ უმსახურია, ისინი ჯარიდან გამოისყიდეს...

კიდევ ერთ საზარელ საიდუმლოს გავამხელ:

საქართველოში ცნობიერების კრიზისი თანდათან სრულდება და ქართველ ხალხს აღარ უნდა ნატოში, მას რუსეთთან მეგობრობა სურს

გაითვალისწინონ ეს, ნაცვლად იმისა, რომ ერთმანეთზე წააქეზონ ხალხი და პოლიცია და პრაქტიკულად ქართველთა ეთნიკური წმენდა ქართველებისვე ხელით მოაწყონ...

 

http://geworld.net/politics/171.html